25‏/4‏/2008

إضراب 6 إبريل في الاسكندرية من وجهة نظر "غيـــــر المضربين"


بعيدا عن أحداث المحلة و الهمجية و غيره إضراب 6 إبريل في الإسكندرية كان سلمي جدا... مش حكتب عن المضربين و لا عن الأحداث زي مالمعظم كتبوا حكتب عن حاجة مختلفة شوية .... بما إني ما أضربتش و نزلت الشارع و رحت الجامعة وحضرت كل المحاضرات حتكلم عن الناس اللي ما أضربتش ... و إيه الأسباب الي دفعتهم لغدم المشاركة


- الاسم رياض
المهنة حارس عقار
ما أضربتش ليه يا عم رياض؟
"إضراب إيه و بتاع إيه بس ... إحنا مضروبين خلقة"



-عبد الستار
كمسري ترام
" آه لو كل كمسري كان أضرب اليوم ده كنا خسرناهم أد كده ... بس هما قالولنا اللي مش حيجي حياخد جزا"

- إيمان
مدرسة ابتدائي
" نضرب إيه؟ اتعلقت ورقة في المدرسة بتأكد إن اللي مش حيجي حيتخصم من مرتبه .. واحنا بصراحة مش ناقصين"


- أ.د\محمد عبد السلام
دكتور في جامعة فاروس (مدرس اللغة الإسبانية)
" أنا يا سينيوريتا لو عايز أعمل حاجة حقيقية هجمع الطلبة و نثور مع بعض و عملتها قبل كدة .. بس أنا النهاردة لو أضربت لوحدي مش هبان .. و بعدين احنا مش في جامعة حكومية"

-أ\ شيماء
مدرسة لغة إنجليزية في جامعة فاروس
"أنا نزلت أهو لابسة أسود عشان يفتكروني تبعهم و مايقربوليش بس كان لازم أدي المحاضرة النهاردة"



دعاء
طالبة في جامعة فاروس
" ما أضربتش عشان مش حاسة بالغلاء و شايفة إن كل شيء كويس ... و أوعي تسيحيلي عند بتوع الإضراب لا يجوا يضربوني "

أحمد
طالب في جامعة فاروس" ابقوا قابلوني لو حصل حاجة وللا لو حد سمعهم .. و بعدين معظم اللي قاعدين في بيوتهم مش مضربين دول خايفين ينزلوا عشان المظاهرات"

مواطنين من طبقات مختلفة منهم اللي خايف من الجزا و اللي شايف إن الإضراب مش هو حل والي مش حاسة بالغلاء و اللي مضروب خلقة و مش ناقص

أما أنا بقى ما شاركتش عشان شايفة إن السكوت علامة الرضا و فعلا مش حل إني أسكت واقعد في البيت و أسيبلهم البلد فاضية ... يمكن في البداية قلت مش حنزل بس لمجرد إني كنت خايفة بعد ما كل صحابي فضلوا يلحوا في التيليفون : حيكسرولك العربية أو حيخدوكي عالقسم و شوية تنبؤات فارغة من بتوع المصريين .. الي شجعتني صديقتي لبنى اللي معاها جنسية فرنسية_عقبالي يا رب_و بايعة البلد باللي فيها.. احنا الاتنين بس اللي جينا من الدفعة و رغم كده أخدنا ال 4 محاضرات من 8:30 لــ 4:30 .. أما طلبة سياحة كان لازم ييجوا.. كان عندهم امتحان ولابسين فورمال ... و باقي الطلبة اللي جم ماحضروش و قعدوا في الفود كورت..


في النهاية الفيديو الي فوق صَوَّرته يوم الإضراب فيه شوارع اسكندرية فاضية إلى حد ما و جامعة فاروس هتحسوها فاضية بس هي كده على طول سواء فيه إضراب أومافيش وأخيرا الفود كورت أزحم مكان في الجامعة ...


معادنا القادم مع غير المضربين في 4
مايو و كل سنة و انت طيب يا ريس ;-)

5‏/4‏/2008

أبو شامة ... ومرشحي الإنتخابات ... و الضحك عالدؤون





ما كنتش دايما بحب أشارك في يوم اليتيم من كل سنة ... كنت بفكر لو انا كنت مكان الطفل ده و ألاقي الناس مرة واحدة في يوم واحد جايين يطبطبوا و يدلعوا و يدوني هدايا و بعدين ماشوفش وش حد فيهم تاني غير السنة اللي بعدها ... ما بحبش أحس إن حد مشفق عليا ولا أحب أتعلق بحد وأصدق إنه حيجي تاني و أستناه و مايجيش ...عشان كده كنت بزورالأيتام في أي يوم غير أول جمعة في إبريل
السنة دي بأة الجامعة استضافت الأيتام عندنا و كانوا عاملينلهم برنامج و كالعادة ماشاركتش بس سارة صديقتي فضلت تلح عليا أعِدّ معاها حفلة يوم اليتيم اللي حتتعمل في حديقة أنطونيادس و حيحضرها 250 طفل لحد ماوفقت في الآخر و سجلتني أورجنايزر
المهم إن سارة هانم جاية يوميها الصبح تقوللي إنهم تبع جمعيات إسلامية.... وأنا جايبة لهم لعب بتغني أيظن.. D:
أما بقا سواق سارة ده حكاية كان لسة أول يوم له فى الشغل اسمه أبو شامة و جي من الصعيد مايعرفش ولا شارع في اسكندرية ولا حتى شارع أبوقير نقوله حديقة أنطونيادس جنب جنينة الحيوانات يقولنا أيوااا جنينة الحيوانات أنا عارفها قولنا الحمدلله راح قاللنا بس آخر مرة رحتها كنت في ابتدائي... حتى بالأمارة كان فيها حيوانات ...
وصلنا المكان ... أطفال كتيير أوي جايين مش أيتام و معاهم أهاليهم سمعوا إن فيه حفلة و هدايا قالو نروح يمكن نطلعلنا بحاجة( هما دول المصريين أبو بلاش كتر منه ) ... كان فيه مسرحيات و فرقة بتغني و مسرح عرائس و إحنا كان دورنا مع مجموعة من الأطفال نعملهم مسابقات و ألعاب و رسم على الوش و غيرهعملنا الأول مسابقة معلومات دينية وجوايز و بعدين لعبنا اللعب التقليدية صياد السمك و التعلب فات و المنديل و الكلب الحيران و الأطفال بقوا يعلمونا لعب جديدة عمرنا ماسمعنا عنها زي قرصة النملة و غمزة و لعبة اسمها شلح بنت خال صلح ... ؛)أخذنا مجموعة من البنات الصغيرين خلناهم يرسموا و يلونوا و يشكلوا صلصال .. في بنات جم يسألونا يعني إيه صلصال افتكرت ساعتها صديقتنا لبنى لو كانت جت معانا كان زمانها قالتلهم صلصال يعني بات آ مودليه ... هههههه أصل لبنى كانت عايشة في فرنسا و نص كلامها فرنساوي و كنا خايفين تيجي معانا تعقد العيال ... :))))
لغاية هنا كله كان ماشي تمام قوي لحد ما جم إتنين من أعضاء مجلس الشعب جايبين في ديلهم مصورين فيديو و بيعدو على واحد واحد يقولوله الأستاذ فلان الفلاني عضو مجلس الشعب و منظم اليوم النهارده و يقول لفلانة أيوة يا حاجة أنا فاكر مشكلتك و مانستكيش و حوارااات فارغة من اياهم عشان يستغلوهم للانتخابات...
خلص اليوم على خير و اتصاحبنا على بسمة و إسراء و مها و ضحى و عائشة و بنات كتيير مش فاكرة أساميهم بس اللي فاكراه كويس أوي البنت اللي جت سألتنا هو في إيه النهاردة الناس ليه عاملالنا كل ده؟؟
رجعت البيت و كالعادة أبو شامة بيقاوح معايا في سكة بيتي مصمم إنه حيدخل يمين أصله عارف بيتي أكتر مني من أيام ما كان في ابتدائي
أول ما دخلت اترميت في حضن أمي و حمدت ربنا على أحلى نعمة مديهالي ...