25‏/4‏/2008

إضراب 6 إبريل في الاسكندرية من وجهة نظر "غيـــــر المضربين"


بعيدا عن أحداث المحلة و الهمجية و غيره إضراب 6 إبريل في الإسكندرية كان سلمي جدا... مش حكتب عن المضربين و لا عن الأحداث زي مالمعظم كتبوا حكتب عن حاجة مختلفة شوية .... بما إني ما أضربتش و نزلت الشارع و رحت الجامعة وحضرت كل المحاضرات حتكلم عن الناس اللي ما أضربتش ... و إيه الأسباب الي دفعتهم لغدم المشاركة


- الاسم رياض
المهنة حارس عقار
ما أضربتش ليه يا عم رياض؟
"إضراب إيه و بتاع إيه بس ... إحنا مضروبين خلقة"



-عبد الستار
كمسري ترام
" آه لو كل كمسري كان أضرب اليوم ده كنا خسرناهم أد كده ... بس هما قالولنا اللي مش حيجي حياخد جزا"

- إيمان
مدرسة ابتدائي
" نضرب إيه؟ اتعلقت ورقة في المدرسة بتأكد إن اللي مش حيجي حيتخصم من مرتبه .. واحنا بصراحة مش ناقصين"


- أ.د\محمد عبد السلام
دكتور في جامعة فاروس (مدرس اللغة الإسبانية)
" أنا يا سينيوريتا لو عايز أعمل حاجة حقيقية هجمع الطلبة و نثور مع بعض و عملتها قبل كدة .. بس أنا النهاردة لو أضربت لوحدي مش هبان .. و بعدين احنا مش في جامعة حكومية"

-أ\ شيماء
مدرسة لغة إنجليزية في جامعة فاروس
"أنا نزلت أهو لابسة أسود عشان يفتكروني تبعهم و مايقربوليش بس كان لازم أدي المحاضرة النهاردة"



دعاء
طالبة في جامعة فاروس
" ما أضربتش عشان مش حاسة بالغلاء و شايفة إن كل شيء كويس ... و أوعي تسيحيلي عند بتوع الإضراب لا يجوا يضربوني "

أحمد
طالب في جامعة فاروس" ابقوا قابلوني لو حصل حاجة وللا لو حد سمعهم .. و بعدين معظم اللي قاعدين في بيوتهم مش مضربين دول خايفين ينزلوا عشان المظاهرات"

مواطنين من طبقات مختلفة منهم اللي خايف من الجزا و اللي شايف إن الإضراب مش هو حل والي مش حاسة بالغلاء و اللي مضروب خلقة و مش ناقص

أما أنا بقى ما شاركتش عشان شايفة إن السكوت علامة الرضا و فعلا مش حل إني أسكت واقعد في البيت و أسيبلهم البلد فاضية ... يمكن في البداية قلت مش حنزل بس لمجرد إني كنت خايفة بعد ما كل صحابي فضلوا يلحوا في التيليفون : حيكسرولك العربية أو حيخدوكي عالقسم و شوية تنبؤات فارغة من بتوع المصريين .. الي شجعتني صديقتي لبنى اللي معاها جنسية فرنسية_عقبالي يا رب_و بايعة البلد باللي فيها.. احنا الاتنين بس اللي جينا من الدفعة و رغم كده أخدنا ال 4 محاضرات من 8:30 لــ 4:30 .. أما طلبة سياحة كان لازم ييجوا.. كان عندهم امتحان ولابسين فورمال ... و باقي الطلبة اللي جم ماحضروش و قعدوا في الفود كورت..


في النهاية الفيديو الي فوق صَوَّرته يوم الإضراب فيه شوارع اسكندرية فاضية إلى حد ما و جامعة فاروس هتحسوها فاضية بس هي كده على طول سواء فيه إضراب أومافيش وأخيرا الفود كورت أزحم مكان في الجامعة ...


معادنا القادم مع غير المضربين في 4
مايو و كل سنة و انت طيب يا ريس ;-)

هناك 7 تعليقات:

غير معرف يقول...

بجد جميل يا كريمان ما شاء الله وربنا يكرمك كمان وكمان وان شاء الله نشوف موضوعك فى الاضراب القادم مستنييينك

Kariman ... A Student Of Life يقول...

merci ya omneya for ur comment
kolaha yomein 3al edrab el gay
bas lazem teeguy el gam3a w mat5afeesh zay yom 6.4
;-)

غير معرف يقول...

واضح ان لك مستقبل فى عالم الصحافة
يعنى نزلت الشارع وصورتى فيديو غير لقاءاتك بفئات مختلفة عملت معاهم حديث
ما شاء الله
ربنا يوفقك
ريم مصطفى

قطرات من شواطئ الحياة يقول...

ما انت عارفة يا ريم إن تنسيقي كان إعلام بس ما قدرتش أسيب اسكندرية
لو عندك شغل انا موافقة ;-)

Dr.Maha salem يقول...

قال الشاعر فؤاد قاعود
غابت مفاتيح الامان وما أسعفتش الكهانة
ما عدت عارف حاطط راسى على مخدة
والا مريحها على دانة
الكارثة مش باينة ملامحها
لكنها جيانة جيانة

mohamed eshra يقول...

جميل الموضوع أوي مع أنها متأخره لكن انا شخصياً فاكر أني مأضربتش رحت الجامعه عادى وكنت مبسوط أوي علشان مفيش زحمه والموصلات وصلت بسرعه والمحاضرات حضرت شويه وزوغت فى الباقى يكني كملت يومي عادي ولما جه وقت الغدا كنت مبسوط أوي أن المطاعم فاضيه مش زحمه والتمشيه بالليل كنت مقلق فيها شويه بس سؤال متعرفيش حيضربوا تانى امتي ؟
:D

mohamed eshra يقول...

جميل الموضوع أوي مع أنها متأخره لكن انا شخصياً فاكر أني مأضربتش رحت الجامعه عادى وكنت مبسوط أوي علشان مفيش زحمه والموصلات وصلت بسرعه والمحاضرات حضرت شويه وزوغت فى الباقى يكني كملت يومي عادي ولما جه وقت الغدا كنت مبسوط أوي أن المطاعم فاضيه مش زحمه والتمشيه بالليل كنت مقلق فيها شويه بس سؤال متعرفيش حيضربوا تانى امتي ؟
:D