17‏/9‏/2008

قليل البوستات يلاقي تاجين في تاج ;-)


مررتلي صديقتي الجميلة جدا شيماء مهدي صاحبة مدونة حنين و أحمد تاجين في تاج واحد و قالتلي : على رأي المثل قليل البوستات يلاقي تاجين في تاج ;-)
و الحمدلله أول تاج حليته قبل كده بعنوان سيم و جيم .. ونون
بس فيه سؤال زياده حضيفه للتاج التاني :
و نبدأ حلقتنا النهاردة و نقول ألوووووو



أذكر 5 أحلام على الاقل تخص ماضيك؟؟

1) زمااااان وأنا صغيرة اوي كنت بحلم أتشعلق في طيارة ورق و أطير لفوق لحد ما اوصل للسحاب و ألعب مع العصافير
2) و أنا أكبر شوية كنت بحلم أبقى جزء من عصابة مافيا و أتفرج بقا على خططهم و أمسك سلاح و ألبس قناع و أمشي أتسحب و أدوس على زرارتقوم القنبلة تفرقع .. هههههه من التأثير السلبي للأفلام
3)و انا في اعدادي لما كنت في مرسم الفنان الصغير كان نفسي أوي أكسب سفر في مسابقة رسم و الحمدلله الحلم اتحقق و كسبت سفر عشر أيام لتونس في مسابقة تونس في عيون المصريين
4) و أنا في ثانوية عامة كنت بحلم أكون من أوائل اسكندرية و الحمدلله الحلم اتحقق معرفش ازاي
5)حلمت كمان أدخل كلية الفنون الجميلة بس اتظلمت في امتحان القدرات و دخلت ألسن جامعة فاروس و دلوقتي بحمد ربنا إني جبت غير لائق عشان بحب أوي الكلية اللي أنا فيها و الدراسة و كل حاجة زي ما كنت بحلم و أكتر كمان
6)السنة اللي فاتت كنت بحلم أعمل معرض للوحاتي و الجامعة حققتلي الحلم ده و بالفعل عملت معرضين اتنين مش معرض واحد


أذكر 5 أحلام على الأقل تخص مستقبلك ؟

1) أتخرج بتقدير عالي
2) عايزة أهاجــــــر ..
3) نفسي أخدم الإسلام .. و لما أهاجر أحسن صورته أمام الغرب .. والحلم دا حبتدي أول خطواته إن شاء الله إني ححضر ندوات how to present islam باللغتين الفرنسية و الإنجليزية في جمعية جيل الأمل
4) نفسي الناس تتقي ربنا شوية و تفكر في آخرتها و نبطل كدب و زور و رشاوي و ربا و نفاق
5) بحلم بالمدينة الفاضلة بتاعت أفلاطون والحلم دا عارفة إنه عمره ما حيتحقق :)

و أن يبقى الحلم مجرد حلــــــــم فهكذا هو أجمل ;-)



مين اتعرفت عليه من خلال المدونة و نفسك تتعرف عليه في الحقيقة ؟

أول حد نفسي أتعرف عليها أوي : شيماء الجمال صاحبة مدونة أيام و أيام .. هي و ابنها فراس أكيد عسول أوي زيهاو كمان صديقتي الصغيرة جوجو صاحبة مدونة أمي ثم أمي
و كمان شروق صاحبة المدونة المفقودة : مصر الموكوسة مزارع كوسة .. واللي رجعت من سفري مالقتهاش و اتمنى حد يفهمني شروق راحت فين؟

أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

صديقتي السورية الرائعة حلا .. و أختها ليـن


أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

عمة أمي ( ماما فوزية) رحمها الله

لمن تهدي هذا التاج ؟؟

لكل من ذكرت أسمائهم في التاج دا على أمل مايكونوش حلوه قبل كده .. و لأول خمس تعليقات حينزلوا ;-)
و اللي مابيحبش التاجات مش لازم يحلوا خالص مفيش مشاكل ..

اعزائي المشاهدين انتهى لقاؤنا اليوم بسرعة أوي .. و نشكر حسن استماعكم إلى اللقاء في الحلقة القادمة
وخلاص ممكن تغير المحطة
:P

هناك 25 تعليقًا:

ShimaaMahdy يقول...

يارب اكون اول تعليق بقى

عموما بحجز التعليق دا وهاقرا وارجع احجز تعليق تانى

D:

مجلة الأم الصغيرة يقول...

و أووووووووول تعليق معانا النهاردة من نصيب شيماء مهدي ;-)

مستنياكي تاني D:

ShimaaMahdy يقول...

هييييييييييييييه طلعت اول تعليق

هييييييييييييه هييييييييييييييه

نيجى بقى للتاج

ماشاء الله احلامك جبااااااااااره عجبنى قوى بتاع المافيا دا ...بطلوا بقى فرجه على التليفزيون P-:

الحمد لله ان معظم احلامك اتحققت و ان شاء الله اللى بتحلمى بيه هايتحقق

و طبعا انا اول و تالت تعليق ان شاء الله يعنى اتنين بس اللى بعدى هايحل التاج

امممممممم ولا اقولك ردى عليا دلوقتى ويبقى واحد


لالالالا ولا اقولك انا ارجع ارد عليكى و يبقى خلاص بقى

هههههههههههههههههههههههه شريره انا

نياهاهاهاهاها

لا بجد

وحشتيييييييييييينى بفزاعه و موت وجدا وجامد قووووووووووووووى


تحياتى


(:

مجلة الأم الصغيرة يقول...

يلا عشان خاطرك هحط رابع تعليق يا شرييييرة D:
أتاري عشان كدا عجبك بتاع المافيا ;-)

وحشتيني أكتررر و أفظع و أجمد و أموت
ههههههههه حلوة أموت دي P:


و بعدين سهرانة لحد دلوقتي بتعملي إيه؟؟ أكيد بترسمي خطة شريرة :S

يللا تصبحي على خير .. و كل سنة و انت طيبة

ShimaaMahdy يقول...

ههههههههههههههههههههه

جديده اموت دى


مش قولتلك هارد عليكى شريره شريره شريره

ههههههههههههههههههههههههه

سهرانه عشان فرحانه بجد بجد وشك حلو عليا (:


امممممممم لالالا الخطط الشريره فى الرد بس D:

معلش بقى تالت تعليق ليا وخامس تعليق فى الترتيب ...شريره بشهاده الايزو 99999999999

D:

و انتى من اهله ياقمر و انتى طيبه كمان


(:

مجلة الأم الصغيرة يقول...

يا رب دايما أشوفك فرحانة كدا يا شيكو و مهنياني بتلت تعليقات مرة واحدة
ههههههههه

D:

Dr.Maha Salem يقول...

ملحوظة صغيرة احب اضيفها
من ضمن احلامك وانتي صغيرة حلم غريييب جدا مرتبط برمضان الا وهو
انك يكون عندك فانوس لونه اسود!!!!
وعمتي(ماما فوزيه) أحن من عرفت في هذه الدنيا الله يرحمها أصرت انها تحقق لك هذا الحلم
اسبوع كامل بتلف في المحلات كلها في اسكندرية شرقا وغربا دون ان تمل ولكنها لم تجده:(
الحمد لله انك ما قولتلهاش على الحلمين التانيين بتوع الطيارة والمافيا والا كانت زعلت جدا انها مش هتقدر تحققهم لك P:
انا فعلا فخورة بيكي لسة فاكراها وياريت تفضلي على طول فاكراها في الدعاء

كلام على بلاطة يقول...

كل عام وانت بخير

elsha3er يقول...

يارب يارب يحققلك كل احلامك

احمد الشاعر

شيتوس الاهلاويه اووووي يقول...

بجد اجابات حلوة
واحلام غير عاديه وجبارة فعلا
ربنا يحققلك كل اللي بتتمنيه يااااارب ان شاء الله
تقبلي مروري
أختك شيتوس

مجلة الأم الصغيرة يقول...

dr.maha
فعلاااااا من صغري بحلم بفانوس أسود .. و ماما فوزية كان نفسها تجيبهولي
ربنا يرحمها ..
و يا رب يخترعوه D:

____________________________

كلام على بلاطة
وانت طيب .. رمضان كريم

__________________________

أحمد الشاعر
أسعدني مرورك .. فلا تحرمني منه
__________________________

شيتوووووووووس
عارفة إن كان عندي قطة مسمياها شيتوس و كنت بدلعها بقولها يا شتسونة
دايما بتفكريني بيها
بشكر تعليقك الجميل و دمت بكل الود

______________________

جوجو يقول...

قطرات من شواطىْ الحياة

هههههههههههههههههههه

عسل والله انا بحبك جدااااااااا

ربنا يحققلك كل احلامك ان شاء الله

ميرسى ياقمر على التاج

بس انا ليه مش بشوفك اون لاين

انى احبكم فى الله يقول...

اشكرك على الموضوع الجميل وبجد التاج جميل تحياتى ليك وتقبل مرورى وتحياتى رمضان كريم

انى احبكم فى الله يقول...

اشكرك على الموضوع الجميل وبجد التاج جميل تحياتى ليك وتقبل مرورى وتحياتى رمضان كريم

blue-wave يقول...

حلوة اوى اجابات التاج
وعاجبنى اوى حلم التشعلق فى طيارة ورق
لأنى انا كمان كنت بحلم ب دا:))
تحياتى

Beram ElMasry يقول...

ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف

لؤلؤة الاسلام يقول...

ما شاء الله
مدونة جميلة اختى ما شاء الله
و اجاباااااااااات

رائئئئعة
و دى اول زيارة ليه و ان شاء الله تتكرر

و تحياتى

رمضان
كريم

جروب الاسلام يقول...

اجابات رائعة اختى
بارك الله فيك و ارجو ان تزورى مدونتى

و تحيااااااااااتى
تقبلى مرورى

مجلة الأم الصغيرة يقول...

جوجو
ميرسي يا جميلة عشان حليتي التاج
حتشوفيني أونلاين كتيير ماتقلقيش
بعد رمضان إن شاء الله

_______________________

إني أحبكم في الله
أهلا بك في المدونة
و كل رمضان و انت بألف خير

________________________

blue wave
ياااه إنت كان كان نفسك تتشعلق في طيارة ورق ؟؟ طمنتني إني مش لوحدي ;-)
تيجي نحققه بجد ؟؟ P:

___________________

بيرم المصري
أشكر ازيارتك الأولى
بس هو مين اللي انحرف؟؟

___________________

خديجة محسن
نورتي المدونة يالؤلؤة الإسلام
و أتمنى ماتكونش الزيارة الأخيرة
و شكرا ليكي

______________________

جروب الإسلام
أهلا بك
تقبل تحياتي

غير معرف يقول...

اولا ازيك يا جميله لان واضح انك كده فعلا قصدى من جوه واكيد بره طبعا...
وشاكره زيارتك الحلوه اليى حلاوتها زياده عشان عرفتنى بيكى ..عجبتنى مواضيع كتيره فى مدونتك يعنى صور ارشادات رمضان وعجبنى انك حاطه قصيدة المبدع نزار فى دمشق وعجبنى بوست اطفال فلسطين والصور دمرتلى قلبى فتافيت..ودى ااقل حاجه..
بس قوليلى انتى ليه عايزه تهاجرى وده مش زى سؤال احساسك ايه انك معانا النهارده..
مع انى عارفه الاجابه بس عايزه اسمعها منك غلاسه باين..
اما انا بقه مفهمتش انتى مصريه ولا سوريه ولا ليكى عرق هناك..
عايزه ااقولك بقه حاجه ومن غير مبالغه انا بعشق كل ما هو سورى واكتر حاجه كانت عاجبانى من تاريخ ناصر الله يرحمه وحدته مع سوريا بحبهم حب وبحس انهم اهلى مع انى متعملتش مع سوريين الا فى حدود المعرفه السطحيه يعنى اشترى حاجه من واحد سورى وخلاص على كده...
بس والدى الله يرحمه اتعاملمعاهم كانوا زمايله فى الشغل فى الامارات وعايزه ااقولك انه بعد وفاته محدش مصرى سأل فينا زى السوريين بابا كان بيقول فيهم شعر ويستاهلو ..
صحيح شعب وحضاره تشرف ربنا يحمى ويبارك فى البلد دى واهلها..
نورتينى واسعدتينى واسفه طولت عليكى بس انتى تستاهلى الرغى ده مدونتك حلوه قوى ..

غير معرف يقول...

برافو يا كاري إجابتك نموزجية كالعادة وشخصيتك مبهرة كالعادة برضه وبالتالي نتيجتك 10علي 10 والجميل في أحلامك انها منطقية وليها تفسير انتي فاهماه من قبل ما تحلمي, بس في حلم جواكي يخص المستقبل لم تبوحي عنه إن مصر تبقي أجمل وده مش هيتحقق غير لو الناس القليلين زيك فضلوا فيها, يعني عشان حتي نقدر نقول إن مصر فيها ملايكة رحمة ومتفوقين في العلم ومتقدمين في الخلق,
وفي حلم يمكن تكوني ما حلمتيش بيه بس إنت اللي حققتيه لنفسك وللناس اللي بتحبلك الخير إنك أخدتي لقب الطالبة المثالية عالجامعة كلها ,
أنا شكلي طولت صح؟
معلش أصل الواحد ما ينفعش يتكلم عنك في سطر أو إتنين , رمضان كريم
ur spirit brother ashraf

مجلة الأم الصغيرة يقول...

عايزة أتطلق و :
أولا أهلا بيكي في مدونتي بجد نورتيني
و بشكر كلماتك الجميلة عن المدونة

أما بالنسبة لسؤال أنا مصرية وللا سورية فأنا مصرية مية في المية بس زيك كده بحب الشعب السوري أوي و ليا صديقتين سوريتين هما اللي دفعوني لزيارة سوريا الصيف ده و استضافوني عندهم و كانت أول مرة أسافر هناك ..
و على فكرة كل كلامك عن السوريين مضبوط جدا و هما فعلا يستاهلوا كدا
اما عن انا ليه عايزة اهاجر اللي إنت عارفة إجابته بس بتغلسي ;-)
حقول يا ستي .. فيه مثل جميــــــل بيقول (انت مصري يبقى لازم تهاجر)
حقولك على حاجة مصر حلوة منغير حاجتين : الحكومة و الشعب
و استحالة تفصلهم عنها يبقى إيه الحلو اللي فيها؟
الحكومة غنية عن التعريف أما الشعب فانزلي الشارع انظري لوجوه الناس شوف بقوا عاملين ازاي من الغلب اللي عايشينه.. بلاش شوفي تصرفاتهم الحشرية و الفضول و الفزلكة و عاااار إنهم يقولوا لحد معرفش لااازم يفتوا في كل حاجة
دا غير يقا كبت الحريات و دفن المواهب و تحطيم الطموحات و الأحلام و غيره
حاجة تانية ... يعني إيه مصر؟؟
ماينفعش نقول إن مصر أهلنا و صحابنا عشان بالمنطلق ده لو أهلك و أصحابك اتنقلوا معاك مكان برة مصر حتحبي المكان دا و تنسي مصر
و ماينفعش نقول مصر البلد اللي اتولدت فيها و شربت من نيلها و اتحرقت في شمسها عشان الأرض والمياه و السما و الشمس موجودين في كــل مكان مش في مصر و بس
ولا ينفع نقول مصر الشوارع و البيوت و الأهرامات و الحضارة .. فاكس أوي
من الآخر مصر حاجتين : شعب و حكومة لو غيرنا طباعهم حنحب مصر
بحب أوي الآية الكريمة اللي بتقول : (ألم تكن أرض الله واسعة فتهاجروا فيها) صدق الله العظيم
أعتقد هي كدا وصلت صح وللا إيه؟؟
بشكرك على زيارتك تاني بجد أسعدتيني و بتمنى تتكر ..
دمت بكل الود

مجلة الأم الصغيرة يقول...

roufi
أشرف بجد أحرجتنييييييييي .. مش عارفة أقولك إيه بس بجد ميرسي أوي على الكلام الجميل دا .. و بجد إنت اللي فعلا شخصية كويسة اوي و طيبة و مبدعة
و كلامك إن مصر فعلا محتاجة الناس الكويسين عشان يخلوها أحسن دا حقيقة بس لما تكون نسبتهم قليلة أوي للأسف صعب أوي يعملوا حاجة تذكر ...
تصدق فكرتني فعلا بحلم نسيت أذكره .. حلم الطالبة المثالية وفعلا و اتحقق الحمدلله ..
صحيح إنت ليه قافل مدونتك؟ أنا من أول رمضان مش عارفة أدخل عليها؟
إنت في روسيا وللا لسا ماسفرتش؟
يا رب تحقق كل أحلامك هناك و ترجع دكتور كبير و تبقى تزورنا في فاروس بردو
على فكرة دفعتنا السنة دي مافيهاش ولاد خالص و ساندرا بتسلم عليك و بتقول حتفتقدك
ابقى افتح البلوج بقا
ودمت بخير
ur spirit sister kariman ;-)

عازف الناى الحزين يقول...

إجابات جميلة و متعقلة
تقبلى وجودى

مجلة الأم الصغيرة يقول...

عازف الناي الحزين
اسم رااااااااائع
أشكرك !
و دمت يألف خير