جانا العيد أهو جانا العيـــد !!

" العيد فرحه.. هييه هييه .. واجمل فرحه .. تجمع شمل قريب وبعيييد ... سعدنا بيها.. هيه هيه .. بيخليها ذكرى جميله لبعد العيد "

الأغنية دي بقا حققت أعلى تعليقات في جروب " أغاني الطفولى المشردة " على الفيسبوك .. الجروب كان فاتح توبيك للحاجات اللي كنا فاهمينها غلط واحنا صغيرين .. يعني ناس كانت فاكرة الجزار بيبيع جزر و المصمت بيبيع صميت بس أغلب التعليقات اللي نازلة بيدوروا حولين كلمة ( سعدنا بيها) ... :
معظم الأطفال _ و أنا كنت منهم _ بيسمعوها سعد نبيهة .. شوية فاكرينهم من شخصيات العيد و اللي فاكراهم ولاد صفاء أبو السعود و اللي بيتسائل ليه سعد نيبهة بيخليها مش بيخلوها اما بقا طفلة ذكية جدا بحييها كانت بتسمعها : سعد نبيها و كانت فاكرة إن العيد له نبي إسمه سعد حاجة كدا زي بابا نويل و تستنا سعد يجي يخبط عالبيت يديها العيدية و الكحك
و في نفس الأغنية بردو في ( كتر يا رب في أعيادنا ) ولد كان دايما يسمعها (جت طيارة في بيت أعيادنا)
المهم إن في الآخر الكل اتفق بالإجمااااااااع إن العيب في صفاء أبو السعود مش فيهم

--------------------------------------------

من أجمل رسايل المعايدة المبتكرة اللي جاتلي :

قريبا سيتم تغيير صيغة ( عيد مبارك) إلى ( يا جمال العيد)

-----------------------------------------------

المهم كل سنة و انتم طيبين و بألف خير و ينعاد عليكم و ربنا ما يوريكو العيد اللي عيدتوا السنة الي فاتت اللي ماكنش عيد أصلا عشان لابتوبي اتسرق أول يوم عيد الفطر .. عشان كدا السنة دي حعيش العيد دا بالطول و حتبسط و حضحك و حعوض الفرحة اللي سرقوها مني العيد اللي فات ...

صحابي و أخواتي اللي بحب تعليقاتهم أوي و بوجهلهم أجمل التهاني:

د. مها ... كل سنة و انت طيبة يا أحلى أم في الدنيا
شيماء الجمال .. كل عيد و انت جميلة و حبوبة و صحبتي دايما يا رب
صباح الصباح .. كل سنة وانت طيب و متميز
جوجو .. أختي الصغيرة الي بحبها أوي كل سنة وانت طيبة و بألف خير
شاشا .. كل سنة وانت فنانة و مبدعة و كاتبة رائعة
شيماء مهدي .. وحشتيني .. و كل سنة وانت طيبة و يا رب يحققلك كل أحلامك
كيارا .. كل عيد وانت شقية و نشيطة كما عهدناك دوما
شيتوس .. كل سنة وانت أهلوية اوي أوي أوي ;-)
roufi .. زميل الدراسة كل سنة و انت طيب و ناجح في حياتك
أحمد حشمت ... يا رب حــــــــر دايما .. و عيد سعيد لك و لأسرتك
Blue_wave .. عيد سعيد و كل سنة و حضرتك مؤلف متميز
الريم .. عيد سعيد ليكي و لاسرتك تقضيه معاهم في اسكندرية بعيد عن الشغل و الدوشة :)
نونو ... عيد مبارك ... وحشتينيي !!
رحيل .. كل عام و أنت متميزة و كاتبة رائعة دايما يا رب
محاسن صابر ... كل سنة و انت طيبة و أم حنونة .و مدونة رائعة
مجنووون .. كل عام و انت مجنون عاقل جدا ;-)
أكون أو لا أكون .. كل سنة و انت طيبة و مدونة رائعة
خديجة محسن .. كل سنة وانت طيبة و ملتزمة و إلى الله أقرب
سارة يا رب أحلامي .. كل سنة و انت طيبة و تحققي كل أحلامك

زواري الجدد : رئيس جمهورية نفسي و حسام وعمر و a few good man و أبلة نظيرة و self meaning و رومانسي وضد التيار و جروب الإسلام
كل سنة و انتم طيبين و متميزين دائما و أبدا

------------------------------------------------

كلمة أخيرة تقبلوها مني ..

بعد 30 يوم من صلاه وصيام وصدقه وفعل خير وقله نوم وقله اكل وتعب واجهاد ودعاء حرام نضيع كل دا ..
من علامات قبول صيامنا في رمضان الثبات على الطاعة .. أكيد الطاعة مش حتكون زي رمضان بس لازم نتمسك بيها و نعمل بالآية الكريمة : ( ولا تكونوا كالتي نقضت غزلها من بعد قوة أنكاثا ) يعني مش بعد كل الجهد اللي حققناه في الشهر دا ننقضه بعدم الثبات ..

و كل سنة و انتم بألف خيـــــــــــــــــــــر
______________________