5‏/4‏/2008

أبو شامة ... ومرشحي الإنتخابات ... و الضحك عالدؤون





ما كنتش دايما بحب أشارك في يوم اليتيم من كل سنة ... كنت بفكر لو انا كنت مكان الطفل ده و ألاقي الناس مرة واحدة في يوم واحد جايين يطبطبوا و يدلعوا و يدوني هدايا و بعدين ماشوفش وش حد فيهم تاني غير السنة اللي بعدها ... ما بحبش أحس إن حد مشفق عليا ولا أحب أتعلق بحد وأصدق إنه حيجي تاني و أستناه و مايجيش ...عشان كده كنت بزورالأيتام في أي يوم غير أول جمعة في إبريل
السنة دي بأة الجامعة استضافت الأيتام عندنا و كانوا عاملينلهم برنامج و كالعادة ماشاركتش بس سارة صديقتي فضلت تلح عليا أعِدّ معاها حفلة يوم اليتيم اللي حتتعمل في حديقة أنطونيادس و حيحضرها 250 طفل لحد ماوفقت في الآخر و سجلتني أورجنايزر
المهم إن سارة هانم جاية يوميها الصبح تقوللي إنهم تبع جمعيات إسلامية.... وأنا جايبة لهم لعب بتغني أيظن.. D:
أما بقا سواق سارة ده حكاية كان لسة أول يوم له فى الشغل اسمه أبو شامة و جي من الصعيد مايعرفش ولا شارع في اسكندرية ولا حتى شارع أبوقير نقوله حديقة أنطونيادس جنب جنينة الحيوانات يقولنا أيوااا جنينة الحيوانات أنا عارفها قولنا الحمدلله راح قاللنا بس آخر مرة رحتها كنت في ابتدائي... حتى بالأمارة كان فيها حيوانات ...
وصلنا المكان ... أطفال كتيير أوي جايين مش أيتام و معاهم أهاليهم سمعوا إن فيه حفلة و هدايا قالو نروح يمكن نطلعلنا بحاجة( هما دول المصريين أبو بلاش كتر منه ) ... كان فيه مسرحيات و فرقة بتغني و مسرح عرائس و إحنا كان دورنا مع مجموعة من الأطفال نعملهم مسابقات و ألعاب و رسم على الوش و غيرهعملنا الأول مسابقة معلومات دينية وجوايز و بعدين لعبنا اللعب التقليدية صياد السمك و التعلب فات و المنديل و الكلب الحيران و الأطفال بقوا يعلمونا لعب جديدة عمرنا ماسمعنا عنها زي قرصة النملة و غمزة و لعبة اسمها شلح بنت خال صلح ... ؛)أخذنا مجموعة من البنات الصغيرين خلناهم يرسموا و يلونوا و يشكلوا صلصال .. في بنات جم يسألونا يعني إيه صلصال افتكرت ساعتها صديقتنا لبنى لو كانت جت معانا كان زمانها قالتلهم صلصال يعني بات آ مودليه ... هههههه أصل لبنى كانت عايشة في فرنسا و نص كلامها فرنساوي و كنا خايفين تيجي معانا تعقد العيال ... :))))
لغاية هنا كله كان ماشي تمام قوي لحد ما جم إتنين من أعضاء مجلس الشعب جايبين في ديلهم مصورين فيديو و بيعدو على واحد واحد يقولوله الأستاذ فلان الفلاني عضو مجلس الشعب و منظم اليوم النهارده و يقول لفلانة أيوة يا حاجة أنا فاكر مشكلتك و مانستكيش و حوارااات فارغة من اياهم عشان يستغلوهم للانتخابات...
خلص اليوم على خير و اتصاحبنا على بسمة و إسراء و مها و ضحى و عائشة و بنات كتيير مش فاكرة أساميهم بس اللي فاكراه كويس أوي البنت اللي جت سألتنا هو في إيه النهاردة الناس ليه عاملالنا كل ده؟؟
رجعت البيت و كالعادة أبو شامة بيقاوح معايا في سكة بيتي مصمم إنه حيدخل يمين أصله عارف بيتي أكتر مني من أيام ما كان في ابتدائي
أول ما دخلت اترميت في حضن أمي و حمدت ربنا على أحلى نعمة مديهالي ...

هناك 5 تعليقات:

غير معرف يقول...

عارفة لو كل واحد فى مصر كان عنده قناعة وما اخدش غير اللى هو محتاجه وفكر فى غيره كان حال البلد اتصلح انما للأسف زى ماأنتى قلتى مبدأنا :ابو بلاش كتر منه
ريم

غير معرف يقول...

نعم ربنا علينا لاتحصى ولاتعد
أكيد انتى كمان أحلى نعمة ربنا انعم بيها على مامتك

mohamed eshra يقول...

أجمل حاجه بتعجبنى فى الأطفال دول انهم واخدين كل حاجه ببساطه يعنى ميشوفوش الموضوع ويخدوه بالجوانب المختلفه اللي انت شايفاها ولا همهم الثروه والسلطه ذى بتوع مجلس الشعب ولا قلقنين على نفسهم ذى المشرفين اللي معاهم شايفين الدنيا كلها بسيطه مش لازم يدرسوا كل حركه حيعملوها

mohamed eshra يقول...

أجمل حاجه بتعجبنى فى الأطفال دول انهم واخدين كل حاجه ببساطه يعنى ميشوفوش الموضوع ويخدوه بالجوانب المختلفه اللي انت شايفاها ولا همهم الثروه والسلطه ذى بتوع مجلس الشعب ولا قلقنين على نفسهم ذى المشرفين اللي معاهم شايفين الدنيا كلها بسيطه مش لازم يدرسوا كل حركه حيعملوها

غير معرف يقول...

karimane , machallah 7lw awi t7lilk llyom!!f3lan 3ala ad mknt mbsouta en elyom d edani elforsa eni a2arab mn nas ymkn mkntch 2rbt mnhm abl kda,nas btdawar 3l5er bgd 3la nas wa5dah mogrd wasila t722 biha msal7ha,ama elatfal dol b2a el mf3oul bh.mhma olna 7assin bihm m7nch 7ssin b7aga,e7na ma3chnach 7iathm,ymkn elbisabar elwa7d lma bt2blo mchakl ktir eno biftkr tofolto,el3adtn btkon as3d mr7la f7iatna.ya tara elatfal dol 7iftkro eh bokra ?!! sarah