السنة دي هنصوم بجـــــــد !!

وحوي يا وحوي !

زينة الشوارع و الفانوس الكبير , انتظار الرؤية , رسايل التهاني و المكالمات , فانوس رمضان اللي لازم أشتريه كل سنة , القطايف و الكنافة و السمبوسك, ترتيب السفرة , العزايم , موائد الرحمن , السحور , ريحة الأكل واحنا صايمين , صلاة التراويح و المساجد على آخرها , المسحراتي , التمر . الخشاف, قمر الدين , بعيد عن الأغاني و المسلسلات و الخيم , شنط رمضان , آخر عشر أيام , دور الأيتام و المسنين و المكفوفات, الجدال حول ليلة القدر , صواني الكحك , التكبير, آذان صلاة العيد , توزيع الألعاب على الأطفال الي راحوا الصلاة , زيارة الأقارب و رسايل المعايدة ....و .. و ... و ...
اللهم بلغنا رمضان !
و كل سنة و انتم طيبين ..

سين و جيم ... و نون P:

تااج جديد مررتهولي صديقتي جوجو صاحبة مدونة أمي ثم أمي
مبدأيا نفسي أشوف الشخص ال.... (الجميل) اللي عمل التاج ده
أكييد مذيع في القناة الأولى أو ضابط تحري p:
هحل التاج بـــس عشان خاطر جوجو ;-)
___________________

احم احم احم

السؤال الأول : بدأت تدون من امتي ؟ و دخلت العالم ده ازاي ؟
بدأت يوم 08/03/22 يوم ما طلعت رخصة القيادة .. مالهاش علاقة طبعا ;-)
دخلت العالم ده كزائرة من زمان أوي من أيام my space و ال windows live blog و بعدين لقيت صحاب ليا هنا على blogspot حبيت العالم ده أوي و حبيت أكون عضوة فيه ..
______________

ايه كان انطباعك في البداية ؟
السؤال ده بيفكرني لما المذيع المصري بيسأل : إيه شعورك وانت معانا على الهوا النهاردة و المواطن يتنح و مايردش و أقوم انا أغير المحطة .. و بما إن مافيش محطة حغير السؤال ;-)
_______________

مين اكتر واحد بتهتم بتعليقه علي بوستك الجديد ؟
بهتم بكل تعليقات زملائي المدونين لأنهم أصحاب رأي و لازم أحترمه بس يمكن بحب أوي تعليقات د\مها سالم لأنها أمي و بتقوللي رأيها بصراحة و بتنصحني دايما عشان أتقدم ..
_________________

ايه أهم حاجة اتعلمتها من عالم التدوين ؟
احترام حرية الرأي
__________________

ايه أكتر حاجة كرهتها ؟
بصراحة بكره الخناقات النابعة عن عدم احترام الرأي الآخر و بكره المدونين الي ماشيين على نظام خالف تعرف لما يحبوا يروجوا لمدوناتهم يقوموا يخالفوا الإسلام عشان يخلقوا مهاجمين زي الأستاذ medus لما قال في آخر بوست ليه إن الحجاب يدعى الزى الاسلامى وسمّى النقاب بالمصيبة الأكبر .. و زي أحمد حربية لما كتب بوست بعنوان "مانشيتات يوم القيامة" و ماحترمش الغيبيات
و غير كده مدونات بتجرح الحياء زي مدونة مكسوفة اللي أثارت الجدل حول بوست "يوم المتعة العالمي و نظافة الفرش و العاهرات"
كل دي حاجات بكرهها و بتستفزني أوي بس قصادها و النسبة الأكبر مدونات بحترمها أوي و بحبها أوي و بتمنى لصحابها كل خير
________________

حاسس ان التدوين له تأثير ؟
أكيد له تأثير .. بما إن كل مدون هنا بيفكر بطريقة مختلفة و بياخد الأمور من زاويته الخاصة يبقى أكيد باطلاعك على أفكارهم بتثري فكرك وبتبني رأيك و بتستوحي أفكار جديدة
ده غير إنه السبب في علاقات جديدة مع أصدقاء مدونين رائعين ..
________________

تهدى التاج لمين ؟
مش بقولكو مذيع في قناة مصرية و تهدي الأغنية دي لمين؟
على العموم أهديه لصديقتي الريم اللي أهدتني تاج قبل كده و لأول تعليق حينزل و لأي حد بيحب يحل تاجز

______________________________________

عدنــا .. و سأشتاقك يا شام !

من القصيدة الدمشقية لنزار قباني و بعض صور التقطها أثناء رحلتي
___________

هذي دمشق و هذي الكأس و الراح
إني أحب و بعض الحب ذباح

(دمشق من فوق جبل قاسيون)

أنا الدمشقي لو شرحتم جسدي
لسال منه عناقيد و تفاح

(السفرجل في بلودان)

مآذن الشام تبكي إذ تعانقي
وللمآذن كالأشجار أرواح

(المسجد الأموي)

للياسمين حقوق في منازلنا
وقطة البيت تغفو حيث ترتاح

( من زهور بلودان)

طاحونة البن جزء من طفولتنا
كيف أنسى و عطر الهيل فواح

(تمثال صلاح الدين أمام قلعة دمشق)

حملت شعري على ظهري فأتبِعني
ماذا من الشعرِ يبقى حينَ يرتاحُ؟

(من فوق بلودان)
_________________________

هنا الشام !

بلودان

قلعة دمشق

الشام القديمة

حارات الشام القديمة

بيت جبري

ساحة المسجد الأموي

فتة حمص ;-)

ساحة قصر العظم

بقصر العظم

طيري يا طيارة طيري !!

تتبقى ساعات قليلة وأكون خارج ذلك الوطن في تجربة جديدة .. ليست المرة الأولى التي أسافر فيها بدون والداي و لكن هذه المرة تختلف .. أنا و أخي في بلد جديد نزوره للمرة الأولى وبدون مرشد.. خليط من المشاعر في قلبي .. هل هو خوف أم سعادة من تلك التجربة الجديدة.. أم قلق على أمي و علي حالها في غيابي؟؟

اصدقائي المدونون سأوافيكم بأخباري أثناء سفري إن شاء الله و أتابع ما تكتبون ...
و أرجو منكم الدعاء بأن يحفظ الله لي والداي حتى عودتي لهما إن كان لي عمر..

أرق تحياتي لكل أصدقائي المدونين

كريمان زمزم

خواطر في جوف الليل

وحدها في الظلام ..
مغتربة في عتمة الليل
يخيل لها ذهنها أصواتا مفزعة
ذئاب الليل تارة و أنين ضعيف تارة و نباح متقطع تارة آخرى
تفزعها فجأة عينا هرتها المتلأئتان في الظلام
تطردها و تغلق الباب بعنف
تريد أن تبقى وحدها
وحدها تماما وحتى آخر الليل
قد كان يملأ ليلها ذلك الصوت العذب الذي تعود أن يحدثها كل مساء
فكان آخر ما تسمع قبل أن تنام ..
وكان يملأ حجرتها بفراشات بيضاء و طيور تغرد
أما اليوم فعادت وحيدة ..
تدعي أنها لا تبالي فقد عاشت نفس الحال قبل أن تعرفه
و لكن شتان ..من فراشات و بلابل إلى ذئاب و وحوش .. هل حقا لا تبالي؟
بداخلها تحترق
تريد أن تبكي و لكن تخشى الهزيمة
تود لو تتسلل ليلا لتطمئن عليه
لو تراه فقط دون أن يراها ..تتبعه بعيناها حتى تكتفي منه
ثم تعود لحجرتها في صمت
و لكنها تعلم بداخلها أنها لن تكتفي أبدا
و أن قلبها الضعيف سيثور يوما ما و يجبرها أن تحدثه
فربما رد عليها .. و ربما لم يرد..و ربما أغلق الخط و أغلق معه قلبه إلى الأبد

_______________________________________

كريمان زمزم

كراسة الواجب

قلت خلصت من المدرسة و الواجبات بس يظهر إنهم ورايا ورايا .. كراسة الواجب تاج وصلني من صديقتي الريم صاحبة مدونة وشاح .. شروط حل الواجب:

1-امرره لسته من المدونين مع ذكر اسمائهم
2-اعلمهم بموضوع الواجب
3-والواجب انى اذكر ست اشياء عن نفسى لا يكتشفها فى من يرانى لاول مرة

الصفة الأولى : من الانطباع الأول الناس بيفتكروني هادية أوي و وديعة مساكين ما يعرفوش الليي عملته في مدرسة التاريخ في تانية ثانوي واللي كنت بعمله مع نورا في حصة العربي واللي عملته انا و باسنت في صحابنا لما كنا في تونس ... و غيره و غيره .. يعني من الآخر الشقاوة بتجري في دمي
الصفة الثانية : إني ما بحبش الاستقرار و بكره أقعد في مكان واحد لفترة طويلة و بحب التغيير أوي عشان كده عندي القدرة إني أتكيف مع أي جو بسرعة اوي
الصفة التالتة : موتي و سمي تلت حاجات : العنف و الكدب و الولاد الهايفة اللي بتستمد رجولتها من السجاير
الصفة الرابعة : لما بكون عايزة حاجة أوي .. بعرف إزاي أوصلها بس بكره المثل اللي بيقول الغاية تبرر الوسيلة
الصفة الخامسة : ممكن أسامح كتير بس مش ممكن أنسى أبدا و بحب الانتقام بس بتجنبه عشان زي ما كتبت هنا عالشمال لذة الإنتقام لا تدوم سوى لحظة أما الرضا الذي يوفره العفو فيدوم إلى الأبــــد
الصفة السادسة الي عمر ما حد اكتشافها فيا إني عمري ما حسيت بالانتماء لمصر .. عارفة إن كل القراء حيهاجموني في النقطة دي بس أنا فعلا ما حستهاش .. و بحب المثل اللي بيقول إنت مصري يبقى لازم تهاجر .

أمرر الواجب لمين؟؟ بما إنه واجب يبقى لازم أمرره لمدونة مدرسة الفشلة للبنات و أمرره أيضا لصديقتي شيماء الجمال صاحبة مدونة أيام وأيام و جوجو صاحبة مدونة أمي ثم أمي و للمحامي أحمد حشمت مدونة المحامي الحر و نونو مدونة 8 بنانبت فاضل واحد ميين يا ترى ؟ أمرره لنفسي تاني هههههههههههه