2‏/8‏/2008

كراسة الواجب



قلت خلصت من المدرسة و الواجبات بس يظهر إنهم ورايا ورايا .. كراسة الواجب تاج وصلني من صديقتي الريم صاحبة مدونة وشاح .. شروط حل الواجب:

1-امرره لسته من المدونين مع ذكر اسمائهم
2-اعلمهم بموضوع الواجب
3-والواجب انى اذكر ست اشياء عن نفسى لا يكتشفها فى من يرانى لاول مرة


الصفة الأولى : من الانطباع الأول الناس بيفتكروني هادية أوي و وديعة مساكين ما يعرفوش الليي عملته في مدرسة التاريخ في تانية ثانوي واللي كنت بعمله مع نورا في حصة العربي واللي عملته انا و باسنت في صحابنا لما كنا في تونس ... و غيره و غيره .. يعني من الآخر الشقاوة بتجري في دمي
الصفة الثانية : إني ما بحبش الاستقرار و بكره أقعد في مكان واحد لفترة طويلة و بحب التغيير أوي عشان كده عندي القدرة إني أتكيف مع أي جو بسرعة اوي
الصفة التالتة : موتي و سمي تلت حاجات : العنف و الكدب و الولاد الهايفة اللي بتستمد رجولتها من السجاير
الصفة الرابعة : لما بكون عايزة حاجة أوي .. بعرف إزاي أوصلها بس بكره المثل اللي بيقول الغاية تبرر الوسيلة
الصفة الخامسة : ممكن أسامح كتير بس مش ممكن أنسى أبدا و بحب الانتقام بس بتجنبه عشان زي ما كتبت هنا عالشمال لذة الإنتقام لا تدوم سوى لحظة أما الرضا الذي يوفره العفو فيدوم إلى الأبــــد
الصفة السادسة الي عمر ما حد اكتشافها فيا إني عمري ما حسيت بالانتماء لمصر .. عارفة إن كل القراء حيهاجموني في النقطة دي بس أنا فعلا ما حستهاش .. و بحب المثل اللي بيقول إنت مصري يبقى لازم تهاجر .

أمرر الواجب لمين؟؟ بما إنه واجب يبقى لازم أمرره لمدونة
مدرسة الفشلة للبنات و أمرره أيضا لصديقتي شيماء الجمال صاحبة مدونة أيام وأيام و جوجو صاحبة مدونة أمي ثم أمي و للمحامي أحمد حشمت مدونة المحامي الحر و نونو مدونة 8 بنانبت فاضل واحد ميين يا ترى ؟ أمرره لنفسي تاني هههههههههههه

هناك 18 تعليقًا:

الريم يقول...

كوكى اشكرك على حل الواجب مكنتش اعرف انك شقية اوى كده ونفسى اعرف عملتى ايه فى مدرسة التاريخ وفى تونس صدقينى اجمل ايام هى الايام ديه اللى انت بتعيشيه دلوقتى ونصيحتى استمتعى بيها لاقصى درجة وبعدين موضوع الانتقام ده مش بحب عارفة يا كوكى لما حد يظلمنى ويتكلم على مثلا والهى بفوض امرى لربنا وااقول ربنا يسامحه وتقريبا بعدها بايام لازم اسمع عنه حاجة مش كويسة يعنى ربنا بياخدنى حقى منه وحكاية انك مش بتحبى مصر ديه انا مش معاكى فيها خالص صحيح بالرغم من كل الظروف الحالية والصعبة اللى بيمر بيها الوطن انما لازم تحبيها وتحسى انك منتمية ليها مش حتحسى بكده الا اذا تغربتى وسافرتى بعيد عنها تقريبا كنت لسه بقرا بوست لواحدسافر يشتغل فى السعودية وتقريبا ده كان اول بوست ليه بعد الفر عارفة قال ايه وبيتكلم بجد بيقول انه مصر وحشتوه اوى واكلها وهواها حتى مياها الملوثة وبيقول انه مكنش كتخيل ان ده حيكون احساسه ابدا كوكى احنا مش بنحس قيمة الشئ الا لما بنقده تحياتى يا جميل

الريم يقول...

كوكى عاملة شكل المدونة الجميل ده ازاى عايزة اغير شكل مدونتى

مصر يا موكوسه .....يا مزارع الكوسه يقول...

التشاج وصلنى يا كوتكوته
بس معقووووووووووووووووووول
معقول تكونى مش بتحبى الكدابين
اصل انا ببقى كده احيانا
:)
لما بتزنق يعنى

Dr.Maha Salem يقول...

يا ترى يا هل ترى...
هو النهاردة آخر ميعاد لتسليم الواجب?
فاهمانى طبعا
;-) ppppp

Ahmed Hishmat يقول...

حرام عليكي
طب أنا ذنبي ايه في الموضوع ده
يعني ناس تعمل العملة وتيجي على دماغنا احنا
بس متشكر على تمرير الواجب ليه

RASHA يقول...

عجبتنى اوى لما بكون عايزة حاجة اوى بعرف ازاى اوصلهاتحياتى لصفاتك الشقية

مجلة الأم الصغيرة يقول...

صديقتي الجميلة الريم
صدقت فنحن لا نشعر بقيمة الأشياء سوى بعد أن ترحل .. جميلة نصائحك ... فزوديني بها دائما و لا تحرميني منها..
بصدق أعجز عن شكرك ..و لكن أتسائل هل هناك شكر بين الأصدقاء ؟؟

أما عن شكل المدونة إختاري layout
و بعدها pick new template
و بعدين إختاري الشكل الي يعجبك و غيري الألوان من fonts and colors
مدونتي حتلاقيها التمبليت قبل الآخيرةاسمه sand dollar مع تغيير الألوان

تحياتي لك

كريمان

مجلة الأم الصغيرة يقول...

مدرسة الفشلة أهلا أهلا
طابوور الصبااااااح بلادي بلادي بلاااادي
D:
شكرا لتعليقك و يا رب ما تتزنقيش أبدا عشان أفضل أحبك ;-)
يلا بسرعة الجرس ضرب

مجلة الأم الصغيرة يقول...

Dr maha
بلاش فضاااايح
يا جماعة د\ مها دي أمي و هي طبعا عارفة إن طووول عمري بعمل واجباتي في الوقت الضايع يعني في آخر دقيقة
عشان كده بتتسائل لو ده آخر معاد D:
د\مها .. مميزة كعادتك ;-)

مجلة الأم الصغيرة يقول...

المحامي الحر أحمد حشمت
قريت الواجب بتاعك تستحق عشرة على عشرة عن جدارة رغم تغيير السؤال بس الرد رااااائع
استمر و لا تبالي سوء فهم من حولك
و بشكرك أوي عشان اهتميت و حليت الواجب

مجلة الأم الصغيرة يقول...

العزيزة شاشا
مرورك الدائم على صفحاتي يسعدني كثيرا .. فلا تحرميني منه
شكرا لك .. و دمت أخت عزيزة

Ahmed Hishmat يقول...

يعني أنا كده خدت عشرة على عشرة
يا سلام لو أرجع وأحطها على مجموع الثانوية العامة بتاعي
بس بالنسبالي دلوقتي مكنتش هتفرق معايا كتير
شكرا على مرورك
وأتمنى يكون دايما
تحياتي

غير معرف يقول...

Kary ana 3agebny gedan el kalam
3an nafsek w di 5atwa 2ygabya awy 3ashan nefhamek aktar bas 7ata di fiha 3'omoud hhhhhhh bas 3arfa ya kary ana 7araya7k men 7akayat masr di
ely ta3baki enty bet7biha bas mesh 7asa 3ashan 7agat kteeeer w el dalil mawgoud <7obek lahlek w
so7abek w batek w nasek w fosahek w basmetek fi wesh el egyptian kol da mesh 7ob ll ard ely 3ashty fiha senine 3omrek 19 ans ana ma3aki fi kol elsalbyat el mawgouda bas akid 7aygy el yom ely netsharaf fih enna masryine isa >wala eih ya kary ana dayman ba2ol enek ensana masha2 allah motazena fi
7ayatek w afkarek mat5alish el mawdou3 da y2asar 3ala e3gab el nas b ensana zaik ana asfa 3ala el tatwil bas da men bab el 7ob w el nasi7a da e7na e5wat fi allah
w re7la sa3ida isa salam ya 7abibaty

نونو يقول...

الله يكرمك يا حبيبتى
اجاباتك حلوة اوى
وبجد انتى شخصية جميلة اوى
التاج وصلى بس معلش انا جاوبت علية قبل كدة ربنا يكرمك
تستهلى مليون تاج

صباح الصباح يقول...

للاسف انا كمان نفسى امشى من البلد.. رحيل بدون عودة.. مع تعليق لافتة (ممنوع الدخول لمن بداخلة انسان)
صباح السكر

غير معرف يقول...

نتيجتك 10من 10
شخصبتك جميلة ومن ناحية شفية فدي حقيقة بس مين مش شقي الشقي هو اللي يتمسك’’’ اما مصر فرفضك لتصرفات ولادها لا يعني انك بتكرهيها بالعكس دا عشان ضميرك صاحي انت حاسة بكده

مجلة الأم الصغيرة يقول...

غير معرف (مها عزوز)

بعد الست صفات اللي قلتهم لسة بتقولي غموض؟ دايما تقولي عليا غامضة مع إني كتاب مفتوح .. يمكن عشان كتيير بداري مشاعري بس ده عشان فيه حاجات بتتحس بس مابتتقالش ده غير إني بكره إن حد يستهون بمشاعري فبحتفظ بيها لنفسي أو بصرح بيها للناس اللي بجد بحبهم و عارفة إنهم حيحترموها
أما عن مصر حقولك حاجة لو قلنا إن سبب حبي لمصر هو ارتباطي بأهلي و اصحابي زي ما قلتي مش صح عشان لو أهلي و صحابي هاجروا معايا مش ححتاج مصر في حاجة بس أكيد الانتماء له معنى أعمق من كده و ما يرطبتش بالأشخاص عشان هما كمان ممكن ينتقلوا بس المعنى ده لسة بدور عليه و مالقتهوش .. ولا إيه رأيك؟
ما فيش تطويل ولا حاجة إنت صاحبة مكان و بعدين بحب تعليقاتك جدا .. شكرا لمرورك و ابقي كرريها دايما ;-)

مجلة الأم الصغيرة يقول...

أحمد حشمت
ثانوية عامة إيه بس ما صدقنا خلصنا و بعدين أكيد مش حتفرق
شكرا لمرورك ..

_______________________

نونو
المدونة نورت بوجودك .. شكرا لتعليقك و لدعائك الجميل .. و لك مني أسمى التحيات

_________________________

صباح الصباح
صباحك ورد
لافتة (ممنوع الدخول لمن بداخله إنسان ) جامدة أوي أوي .. أصابت الهدف
جزيل الشكر

_________________________

أشرف
شكرا لمرورك بين صفحاتي .. و مبروك على مدونتك .. جميلة بجد .. استمر