22‏/8‏/2008

سين و جيم ... و نون P:


تااج جديد مررتهولي صديقتي جوجو صاحبة مدونة أمي ثم أمي
مبدأيا نفسي أشوف الشخص ال.... (الجميل) اللي عمل التاج ده
أكييد مذيع في القناة الأولى أو ضابط تحري p:
هحل التاج بـــس عشان خاطر جوجو ;-)

___________________

احم احم احم

السؤال الأول : بدأت تدون من امتي ؟ و دخلت العالم ده ازاي ؟
بدأت يوم 08/03/22 يوم ما طلعت رخصة القيادة .. مالهاش علاقة طبعا ;-)
دخلت العالم ده كزائرة من زمان أوي من أيام my space و ال windows live blog و بعدين لقيت صحاب ليا هنا على blogspot حبيت العالم ده أوي و حبيت أكون عضوة فيه ..
______________

ايه كان انطباعك في البداية ؟
السؤال ده بيفكرني لما المذيع المصري بيسأل : إيه شعورك وانت معانا على الهوا النهاردة و المواطن يتنح و مايردش و أقوم انا أغير المحطة .. و بما إن مافيش محطة حغير السؤال ;-)
_______________

مين اكتر واحد بتهتم بتعليقه علي بوستك الجديد ؟
بهتم بكل تعليقات زملائي المدونين لأنهم أصحاب رأي و لازم أحترمه بس يمكن بحب أوي تعليقات د\مها سالم لأنها أمي و بتقوللي رأيها بصراحة و بتنصحني دايما عشان أتقدم ..
_________________

ايه أهم حاجة اتعلمتها من عالم التدوين ؟
احترام حرية الرأي
__________________

ايه أكتر حاجة كرهتها ؟
بصراحة بكره الخناقات النابعة عن عدم احترام الرأي الآخر و بكره المدونين الي ماشيين على نظام خالف تعرف لما يحبوا يروجوا لمدوناتهم يقوموا يخالفوا الإسلام عشان يخلقوا مهاجمين زي الأستاذ medus لما قال في آخر بوست ليه إن الحجاب يدعى الزى الاسلامى وسمّى النقاب بالمصيبة الأكبر .. و زي أحمد حربية لما كتب بوست بعنوان "مانشيتات يوم القيامة" و ماحترمش الغيبيات
و غير كده مدونات بتجرح الحياء زي مدونة مكسوفة اللي أثارت الجدل حول بوست "يوم المتعة العالمي و نظافة الفرش و العاهرات"
كل دي حاجات بكرهها و بتستفزني أوي بس قصادها و النسبة الأكبر مدونات بحترمها أوي و بحبها أوي و بتمنى لصحابها كل خير
________________

حاسس ان التدوين له تأثير ؟
أكيد له تأثير .. بما إن كل مدون هنا بيفكر بطريقة مختلفة و بياخد الأمور من زاويته الخاصة يبقى أكيد باطلاعك على أفكارهم بتثري فكرك وبتبني رأيك و بتستوحي أفكار جديدة
ده غير إنه السبب في علاقات جديدة مع أصدقاء مدونين رائعين ..
________________

تهدى التاج لمين ؟
مش بقولكو مذيع في قناة مصرية و تهدي الأغنية دي لمين؟
على العموم أهديه لصديقتي الريم اللي أهدتني تاج قبل كده و لأول تعليق حينزل و لأي حد بيحب يحل تاجز

______________________________________

هناك 16 تعليقًا:

جوجو يقول...

السلام عليكم

ميرسى ياقمر على حل الواجب

بس ايه ده اديكى على الاجابات 10 من 10

اه والله لجاباتك زى العسل زيك طبعا

blue-wave يقول...

هااى
حلو التاج
واجاباتك حلوة ودمها خفيف
فعلا عامل زى اسئلة القناة الأولى:))
بس اجاباتك حلوة بصراحه
تحياتى

مجلة الأم الصغيرة يقول...

جوجو ميرسي ليكي انتِ و للدرجة الجميلة اللي اديتيهالي :)))

_________________________

blue wave
حلو أوي إنك انت كمان شايفه من أسئلة القناة الأولى ;-)
و أشكر اهتماماك و قراءتك للإجابات

شيتوس الاهلاويه اووووي يقول...

ازيك ياقمر ميرسي علي تشريفك للمدونة بتاعتي ويارب دايما منوراني وان شاء الله تدوم الصلة مابيننا وتاج حلو واجابات احلي بكتييييير .
دمتي بكل خير
تقبلي مروري
أختك شيتوس

أكون أو لا أكون يقول...

السلام عليكم ورحمة الله وبركاته
كل سنه وانتي طيبه...
شكرا على زيارتك لمدونتي ياعزيزتي وشرفتينا...
اجوبتك جميله جدا ورقيقه...
اتمنى نبقى اصدقاء...
تحياتي...

مجلة الأم الصغيرة يقول...

شيتوس الأهلاوية أوي
انن كمان أهلاوبة على فكرة بس مش أوي كده ;-)
أهلا بكِ في أي وقت نورتينا

______________________________

أكون أو لا أكون that's the question ;-)
زيارتك تسعدني و بالطبع صرنا أصدقاء
شكرا لك و تقبلي كل التحية

Dr.Maha Salem يقول...

انا النهاردة اكتشفت حقيقة مؤلمة
انا اكتشفت انتي ليه طول عمرك بتجيبي النمر النهائية في الامتحانات:
انا كنت فاكرة انه عشان انا اللى بذاكرلك :(
لكن طلع عشان انتي بتبهري المصحح باسلوبك ولباقتك في الاجابة

مجلة الأم الصغيرة يقول...

أمي الفاضلة د\مها
حقا أخجلتيني $: $: $:

ســـهــــر يقول...

احلى حاجة فى اى تاج انة بيعرف الناس اكتر على بعضها بس تعرفى اجاباتك لذيذة اوى وباين عليكى بنوتة زى السكر

كل سنه وانتى بالف خير

يارب احلامي تتحقق يقول...

جميله اجاباتك يا قطرات واتمني انك تفضلي كده دماغك كبير وردودك ممتعه

مستنيه كتاباتك

صباح الصباح يقول...

بتفكرينى بهالة حشيش
at your request at FM dedicated toooooooooooooooo
بس باقولك ملحوظة صغننة اوى.. الحاجات الغلط اللى بتشوفيها فى مدونات ناس تانية ياريت ما تبقيش تذكريها.. عشان كدة انتى بدون قصد بتعملى لهم ترويج ودعاية .. بس اكتفى بذكر النقط اللى مش عاجباكى بدون ذكر اصحابها..
دمتى بكل الود

mahasen saber يقول...

ازيك يا قطرات انا لقيتك سايبه تعليق جميا فى مدونتى قولت ادخل اشوف المدونه الجميله دى وفعلا طلعتى جميله وفكرتينى بواحده صحبتى كانت برضه مبتسش باى نوع من انواع الانتماء ناحية البلد ودى كانت نقطة الخلاف الوحيده بينا ولما اناقشها تقولى بصى فى الشوارع الناس عامله ازاى...اما صور دمشق فدى بقه ابهجتنى جدا لانى بعشق كل ما هو سورى وصور فلسطين فوجعتنى اكتر ما انا موجوعه يا قلبى المفطور على الاطفال ومفطور اكتر انى مش قادره اعمل حاجه غير الحزن والمقاطعه ساعات...واخيرا ومتاخر كل سنه وانتى طيبه مع انها متاخره شويه وشاكره ليكى زيارتك الجميله اليى خلتنى اتعرف بمدونتك..وكل رمضان وانتى بالف خير

غير معرف يقول...

اه انا نزلت التعليق باسمى محاسن انا صاحبة مدونة عايزه اتطلق و لو مش واخده بالك ...واسفه على الازعاج..

مجلة الأم الصغيرة يقول...

سهر
وانت بألف خير نورتيني

_____________

يا رب أحلامي تتحقق
شكرا لك .. و يا رب أحلامك تتحقق ;-)

_________________

صباح الصباح
هالة حشيش مرة واحدة هههههه
بس ملحوظتك صح مية في المية و ححاول تجنب الغلط دا المرة الجاية إن شا الله
بنصائحك سأتقدم فلا تحرمني منها

______________

محاسن صابر
أهلا بك نورتيني و نورتي المدونة
و مبسوطة أوي إني اتعرفت على مدونتك الرائعة اللي حزورها دايما إن شاء الله
و كل سنة وانت طيبة و جميلة دايما يا رب

أحمد حربية يقول...

اعذريني إذا اختلفت معاكي ومع كل اللي شايفين انك المفروض تاخدي الدرجة النهائية على اجاباتك، واعذريني كمان لما أقولك انك ظلمتيني ظلم بين لما قلتي اني مش بحترم الغيبيات لأن ده مش صحيح 100%، مانشيتات يوم القيامة أبعد ما يكون عن الطريقة اللي فهمتيها بيها، هي فقط كانت محاولة لفضح وتوضيح طرق كتابة الجرائد والسياسية التحريرة لكل جرنال، وأنهم -الصحفيين- لن يعدمو الغش والتدليس والنفاق حتى لو - حرف امتناع الإمتناع- كتبوا في هذا اليوم المهيب..اتمني انه في الشرح القصير ده أكون وصلت فكرتي، وحتى في حالة لو جانبني الصواب فأنا ابرء نفسي من عدم احترام الغيبيات، وأطالبك - بكل احترام- أن تتأكدي قبل اطلاق تهمة بهذه الخطورة.
شكرا جدا لتفهمك المأمول.
أحمد حربية

مجلة الأم الصغيرة يقول...

الأستاذ أحمد حربية
أولا أشكر اهتمامك و تعليقك على الموضوع
ثانيا والأهم انت قلت في مدونتك أن الموضوع ابتدى (( لعبـة)) و قال نعالى :" و لئن سألتهم ليقولن إنما كنا نخوض و نلعب قل أبالله و و آياته و رسوله كنتم تستهزئون"التوبة 65
و إذا رأيت الذين يخوضون في آياتنا فأعرض عنهم حتى يخوضوا في حديث غيره و إما ينسينك الشيطان فلا تقعد بعد الذكر مع القوم الظالمين" الأنعام 68

و إن كان تبريرك للخوض في تلك الامور إنه "لفضح وتوضيح طرق كتابة الجرائد والسياسية التحريرة لكل جرنال، وأنهم -الصحفيين- لن يعدمو الغش والتدليس والنفاق حتى لو - حرف امتناع الإمتناع- كتبوا في هذا اليوم المهيب"
فحقيقة الصحفيين (مع احترامي لكونك صحفي) معروفة كالنار على العلم مش محتاجة نوصلها ليوم القيامة عشان نقنع الناس يعني مين في مصر مش مدرك الغش و التدليس و النفاق اللي في الصحف ؟
عارفة إن النية سليمة جدا بس بتحوم حولين أمر غير مسموح لنا الاقتراب منه
كحديث الرسول صلى الله عليه و سلم "كالراعي يرعى حول الحمى يوشك أن يرتع فيه ، ألا وأن لكل ملك حمى ، ألا وإن حمى الله محارمه"

حاجة تانية أهم .. لما ربنا يقول عن يوم القيامة :" يا أيها الناس اتقوا ربكم إن زلزلة الساعة شيء عظيم يوم ترونها تذهل كل مرضعة عما أرضعت و تضع كل ذات حمل حملها و ترى الناس سكارى و ما هم بسكارى و لكن عذاب الله شديد" الحج
يبقى بعد كلام ربنا وهول الموقف ينفع نقول حاجة تانية حتى لو هزار؟
" أفمن هذا الحديث تعجبون و تضحكـــــــــــــــون و لا تبكـــــــون "النجم

على فكرة أنا عندي تسعتاشر سنة و متخرجة من مدرسة راهبات بس اتعلمت كويس أوي إن الدين مفيهوش هزار و إن الغيبيات مش من حق أي حد أيا كانت نيته إنه يتكلم عنها أو يمسها بسوء..

شكرا لاهتمامك
و لك مني أرق التحية ..

كريمان زمزم